Home Srilanka செங்கலடியில் வாள்வெட்டில் 15 வயது சிறுவன் பலி

செங்கலடியில் வாள்வெட்டில் 15 வயது சிறுவன் பலி

மட்டக்களப்பு – ஏறாவூர் பொலிஸ் பிரிவிற்கு உட்பட்ட பகுதியில் 15 வயது மாணவரொருவர் வாள் வெட்டிற்கு இலக்காகி உயிரிழந்துள்ளார்.

குறித்த சம்பவம் இன்றைய தினம் இடம்பெற்றுள்ளதுடன், பாடசாலையில் மாணவர்களுக்கிடையே ஏற்பட்ட சண்டையே இவ்வாறு வாள்வெட்டில் முடிந்துள்ளதாக தெரியவருகிறது.

செங்கலடி பாடசாலையொன்றில் பத்தாம் ஆண்டில் கல்வி கற்கும் குறித்த மாணவனை, அதே பாடசாலையில் கற்கும் கொம்மாதுறையை சேர்ந்த மாணவன் தாக்கியுள்ளார்.

தாக்குதலுக்கு இலக்கான செங்கலடி மாணவனை அவர்களது உறவினர்கள் மற்றைய மாணவனின் வீட்டிற்கு அழைத்து சென்று தாக்கிய விடயம் தொடர்பில் கேட்ட போது ஏற்பட்ட கருத்து முரண்பாட்டால் கொம்மாதுறையை சேர்ந்தவர்கள் செங்கலடியை சேர்ந்தவர்களை தாக்கியுள்ளனர்.

இதன்போது வாள்வெட்டு தாக்குதலும் மேற்கொள்ளப்பட்டுள்ளதாக தெரியவரும் நிலையில் பாரிய வாள் வெட்டு தாக்குதலுக்கு இலக்கான செங்கலடியை சேர்ந்த மாணவன் ரமணன் திவ்வியநாதன் சம்பவ இடத்திலேயே உயிரிழந்துள்ளார்.

இம்மாணவனின் உறவினர்களான சசிகுமார் மற்றும் பிரேமநாதன் ஆகிய இருவரும் பாரிய வெட்டுக்காயங்களுக்கு உள்ளாகியுள்ளனர்.

சம்பவத்தை அறிந்த ஏறாவூர் குற்றத்தடுப்பு பொலிஸார் சம்பவ இடத்துக்கு நேரடியாக சென்று விசாரணைகளை மேற்கொண்டு மாணவனின் சடலத்தை ஏறாவூர் ஆதார வைத்தியசாலையிலும், காயங்களுக்குள்ளானவர்களை மட்டக்களப்பு போதனா வைத்தியசாலையிலும் அனுமதித்துள்ளனர்.

கொலைக்கு காரணமானவர்கள் தப்பிச்சென்றுள்ள போதும் கொலைக்கு பயன்படுத்தப்பட்ட நவீன ரக வாள் ஏறாவூர் பொலிஸாரால் கண்டெடுக்கப்பட்டிருக்கிறது.

இந்த நிலையில் மேலதிக விசாரணைகளை ஏறாவூர் குற்றத்தடுப்பு பொலிஸார் மேற்கொண்டு வருகின்றனர்.

- Advertisement -

சமீபத்திய செய்திகள்

- Advertisement -