Home Srilanka 19ஆவது திருத்தச் சட்டத்தில் உள்ள இரண்டு விடயங்களை 20இல் அமுல்படுத்த எதிர்பார்த்துள்ள ஜனாதிபதி

19ஆவது திருத்தச் சட்டத்தில் உள்ள இரண்டு விடயங்களை 20இல் அமுல்படுத்த எதிர்பார்த்துள்ள ஜனாதிபதி

19ஆவது அரசியலமைப்புத் திருத்தச் சட்டத்தை இரத்துச் செய்யும் போது அதில் உள்ள இரண்டு சிறப்பான விடயங்களை 20ஆவது திருத்தச் சட்டத்தின் மூலம் அமுல்படுத்த ஜனாதிபதி கோட்டாபய ராஜபக்ச எதிர்பார்த்துள்ளதாக ராஜாங்க அமைச்சர் கலாநிதி நாலக கொடஹேவா தெரிவித்துள்ளார்.

மல்வத்து மற்றும் அஸ்கிரிய மாநாயக்க தேரர்களை இன்று சந்தித்த பின்னர் கண்டியில் செய்தியாளர்களிடம் கருத்து வெளியிடும் போதே அவர் இதனை கூறியுள்ளார்.

தனிப்பட்ட அரசியல் காரணங்களுக்காகவே 19ஆவது அரசியலமைப்புத் திருத்தச் சட்டம் கொண்டு வரப்பட்டது. எனினும் அதில் சில சிறந்த விடயங்கள் உள்ளன.

குறிப்பாக ஜனாதிபதியின் பதவிக்காலத்தை குறைத்தமை, ஜனாதிபதித் தேர்தலில் போட்டியிடக் கூடிய தவணை குறைத்தமை என்பன சிறந்தவை.

இந்த இரண்டு விடயங்களை அப்படியே தொடர்ந்தும் முன்னெடுக்க வேண்டும் என்பதே ஜனாதிபதியின் நிலைப்பாடு இருப்பதாக நான் கருதுகிறேன் எனக் கூறியுள்ளார்.

மேலும் புதிய அரசியலமைப்புத் திருத்தச் சட்டத்தில் துணை பிரதமர் பதவி உருவாக்கப்படுமா என செய்தியாளர்கள் எழுப்பிய கேள்விக்கு பதிலளித்துள்ள கொடஹேவா, புதிய அரசியலமைப்புத் திருத்தச்சட்டத்தின் உள்ளடக்கம் பற்றி தற்போதே எதிர்வு கூற முடியாது என குறிப்பிட்டுள்ளார்.

- Advertisement -

சமீபத்திய செய்திகள்

- Advertisement -