Home Breaking News பொய்யான செய்தி வெளியிட்டால் சட்ட நடவடிக்கை - ஜனாதிபதியின் ஊடகப் பிரிவு

பொய்யான செய்தி வெளியிட்டால் சட்ட நடவடிக்கை – ஜனாதிபதியின் ஊடகப் பிரிவு

நாட்டின் தற்போதைய அரசாங்கம் பதவிக்கு வந்த பின்னர் கடந்த காலத்தில் இல்லாத அளவுக்கு இயற்கை சுற்றுச் சூழல் அழிக்கும் நடவடிக்கைகள் ஆரம்பிக்கப்பட்டுள்ளதாக கூறி பொய்யான செய்திகள் சமூகமயப்படுத்தப்படுவதாக கண்டறியப்பட்டுள்ளது என ஜனாதிபதியின் ஊடகப் பிரிவு தெரிவித்துள்ளது.

பாதுகாக்கப்பட்ட வனங்கள் தீயிடப்படுவதாகவும் இயற்கை காடுகளில் உள்ள மரங்கள் வெட்டப்படுவதாகவும் கூறி பொய்யான செய்திகள் வெளியிடப்படுகின்றன.

இதற்கு முன்னர் இப்படியான இயற்கை அழிவு ஏற்படவில்லை எனவும் இவ்வாறான சட்டவிரோத நடவடிக்கை தொடர்பில் அரசாங்கம் அமைதியாக இருக்கின்றது என காட்டும் முயற்சியை இந்த செய்திகளை உருவாக்கும் நபர்கள் மேற்கொண்டுள்ளனர். இந்த செய்திகள் பொய்யானவை மற்றும் உருவாக்கப்பட்டவை என்பது அவற்றை கண்காணித்ததன் மூலம் தெரியவந்துள்ளது.

சுற்றாடல் அழிக்கப்படுவதாக கூறப்படும் பொய்யான செய்திகள் சமூக ஊடகங்களிலும் சில அச்சூடகங்களிலும் தொலைக்காட்சி மற்றும் வானொலிகள் மூலம் பிரசாரப்படுத்தப்படுகின்றன.

இவ்வாறு வெளியிடப்படும் செய்தி போலியானது என்ற விடயம் உறுதியானதும் அவை சமூக ஊடகங்களில் இருந்து நீக்கப்படுகின்றன. இதன் பின்னர் வேறு பொய்யான செய்தி உருவாக்கப்பட்டு வெளியிடப்படுகிறது.

எதிர்க்கட்சிகள் மற்றும் அவற்றுக்கு ஆதரவானவர்கள் இந்த பொய்யான செய்திகளுக்கு பெரியளவில் பிரபலத்தை பெற்று கொடுத்து வருவதாகவும் மக்களை தவறாக வழிநடத்துவதற்காக இவ்வாறு பொய்யான செய்திகளை உருவாக்கி, சமூகமயப்படுத்தும் நபர்களை அடையாளம் கண்டு, அவர்களுக்கு எதிராக சட்ட நடவடிக்கை எடுக்க அரசாங்கம் தீர்மானித்துள்ளதாகவும் ஜனாதிபதியின் ஊடகப் பிரிவு குறிப்பிட்டுள்ளது.

- Advertisement -

சமீபத்திய செய்திகள்

- Advertisement -